مبارك بن عينان الهاجري

من طرف سمو الاحساس الجمعة يناير 29, 2010 11:37 pm

ياوجودي وجد طيـر وصقـاره فقيـر
تو ماخوى مع الشيخ من ضمن أخويـاه

حدته الايـام والديـن والوقـت العسيـر
ومن خلـق الله والطيـر ماعمـره قنـاه

مايميز طلع طيـره ليـا تلـه أعصيـر
وكل ماهده على الطلع من دونـه دعـاه

والنداوي غلق أسبـوع مـاذاق النسيـر
عرضه برد الهبايـب وخطرالـه عشـاه

في حياته مابعـد شـل ولا هـد طيـر
وابتلا في الطير والطير فيـه الله بـلاه

مالقاله من ردى الحظ في الحمله شويـر
واللمعـزب قـدم عينـه وديـانـه وراه

أتوجد وجد طيـره وأنـا مانـي بخيـر
لو يفيد الوجد حولـت مـن راس العـلاه

منك ياللي تسكن القلب من عادك صغيـر
قبل تقرا سورة الحمد وتعـرف الصـلاه

عاد أهلكم في أول القيض تنزل جال بير
فوق عد منزله حد عـرق مـن حصـاه

وعاد ورد الطرش يومين والثالث صدير
في آخر المصياف والقيض في أول مبتداه

وعاد أبوك الراي عنده وفي ربعه الأمير
والجماعه في ذرى الله ومن عقبـه ذراه

وعاد بيته في الرفاعه ومفروشه حصيـر
شاهق لاشافه الضيف مـن بعـد نصـاه

وعاد ضوه من سناها على العارض تنير
قبل يذن مذن الفجـر وأوجـاره شعـاه

وعاد خيره عند ربعه ويلقـاه القصيـر
ومايذوق الزاد من دون ربعه واقصـراه

وعاد مربط خيلكم حي والسيف الشطيـر
الصدا ماناش حـده وقلـل مـن شبـاه

وعاد خطلان اليماني تشـار وتستشيـر
والرفيق ان زل يذخر ويدمحلـه خطـاه

وعاد قلبك في المدينه مثل عين الضريـر
والقصر ماذقـت زاده ولا شربـت مـاه

وعاد تفكيرك ليا جيـت للجـم الغزيـر
كيف أموتك عشق وارجع على قيد الحياه

كـل هـذا قبـل دورات بقعـا تستديـر
والسنين تمر والوقـت ماتاقـف رحـاه

قبل صدك ميسمه يكوي الضلع القصيـر
يوم بير الغي تومي على جالـك رشـاه

كان عشقك غير والحين عشقك صار غير
لو تشوف الضامي الحنج ماتقطع ضمـاه

ولا أنا لادلبح النجم وجهه فـي الغديـر
قمت أجر الصوت وأكتب على حيد النباه

بيت شعر ماكتبه أصمعـي ولا جريـر
بس يبقا مـن جمالـه وترويـه الـرواه

أي ليـل مـاأرى ذالـك البـدر المنيـر
أي عشـق يقتـل العاشقينـا وأسـفـاه

وياصغير في عيوني وفي قلبـي كبيـر
ليت قلبي برق غيرك ليـا شافـه رعـاه

كان ماضره فراقك ولا الفرقـا تصيـر
والسهر يقطع نواصيه في سمـر الجبـاه

ومل قلب مابقا الا من ضلوعـه يطيـر
كل مادقه علـى الغالـي المقفـي غـلاه

السهـر جاعـد شـداده وونتـه البعيـر
والحزن ضلع المسامه ودمعاتـه عصـاه

ياقليل الشوق ماعاد مـن عقبـك كثيـر
الجفـا فـج الحنايـا ومعلـوقـي زواه

يابلايه يادوايه تـرى وضعـي خطيـر
والبلا انـي عارفـك يابـلاه ويـادواه

والله اني عاقل بس فـي حبـك غريـر
واشهد أن القلب مبطي ويبطي في عمـاه

لك علي اني أحبك ولـو مانـي بخيـر
من غلاك اللي ذبحنـي ولا منـه غنـاه

من طرف الجنوبي292 السبت يناير 30, 2010 1:16 am

لاهنـــــــــــــــــــــــــــــــــــــــــت على القصيدة

من طرف سمو الاحساس السبت يناير 30, 2010 1:54 pm

ولا انت يالجنوبي

مبارك بن عينان الهاجري

مبارك بن عينان الهاجري

رد: مبارك بن عينان الهاجري

رد: مبارك بن عينان الهاجري